മഹാരാഷ്ട്ര രാഷ്ട്രീയത്തില് നാടകീയ വഴിത്തിരിവ്. ബിജെപിയുമായി ഇടഞ്ഞുനില്ക്കുന്ന ശിവസേനാ അധ്യക്ഷന് ഉദ്ദവ് താക്കറെ എന്സിപി നേതാവ് ശരദ് പവാറുമായി ഫോണില് സംസാരിച്ചതായി ദേശീയ മാധ്യമങ്ങള് റിപ്പോര്ട്ടു ചെയ്തു.
ശിവസേനാ നേതാവ് സഞ്ജയ് റാവത്ത് കഴിഞ്ഞ ദിവസം പവാറുമായി കൂടിക്കാഴ്ച നടത്തിയിരുന്നു. ഇതിനു പിന്നാലെയാണു പവാറുമായി ഉദ്ദവിന്റെ ഫോണ് സംഭാഷണം. ശരദ് പവാര് കോണ്ഗ്രസ് അധ്യക്ഷ സോണിയ ഗാന്ധിയുമായി കൂടിക്കാഴ്ച നടത്താന് ഡല്ഹിക്കു പോകുമെന്നും സൂചനയുണ്ട്.
തെരഞ്ഞെടുപ്പ് ഫലം പുറത്തുവന്ന് ഒരാഴ്ച പിന്നിട്ടിട്ടും ബിജെപി-ശിവസേന തര്ക്കം കാരണം മഹാരാഷ്ട്രയില് സര്ക്കാര് രൂപീകരണം അനിശ്ചിതത്വത്തിലാണ്.
രണ്ടരവര്ഷം വീതം മുഖ്യമന്ത്രി സ്ഥാനം പങ്കുവയ്ക്കാതെ സര്ക്കാരുണ്ടാക്കാന് കൂടെ നില്ക്കില്ലെന്നാണു ശിവസേനയുടെ നിലപാട്. ആദിത്യ താക്കറെയെ ആദ്യം മുഖ്യമന്ത്രിയാക്കണമെന്നും സേന ആവശ്യപ്പെടുന്നു.
അയോധ്യ കേസിലെ സുപ്രീം കോടതി വിധിക്കു മുന്പു സംസ്ഥാനത്തു സര്ക്കാര് രൂപീകരണം നടക്കണമെന്ന മുന്നറിയിപ്പുമായി എന്സിപി അധ്യക്ഷന് ശരദ് പവാര് രംഗത്തെത്തിയിട്ടുണ്ട്.
മഹാരാഷ്ട്രയില് എന്സിപി ശിവസേനയുമായി സഖ്യത്തിനു തയാറായേക്കുമെന്ന അഭ്യൂഹങ്ങള്ക്ക് ആക്കം കൂട്ടിയാണ് എന്സിപി അധ്യക്ഷന്റെ പരാമര്ശം.
കഴിഞ്ഞ ദിവസം ശിവസേന നേതാവ് സഞ്ജയ് റൗത്ത് ശരദ് പവാറിനെ സന്ദര്ശിച്ചതോടെ, ശിവസേന സര്ക്കാര് രൂപീകരിക്കാന് ബദല് സാധ്യതകള് തേടുകയാണെന്ന അഭ്യൂഹങ്ങളും പ്രചരിക്കുന്നുണ്ട്.
അനിശ്ചിതത്വം തുടരുന്നതിനിടെ സംസ്ഥാനത്തെ കോണ്ഗ്രസ് നേതാക്കള് ഡല്ഹിയില് പാര്ട്ടി അധ്യക്ഷ സോണിയ ഗാന്ധിയുമായി കൂടിക്കാഴ്ച നടത്തിയിരുന്നു.
മുതിര്ന്ന നേതാക്കളായ ബാലാസാഹിബ് തൊറാട്ട്, അശോക് ചവാന്, പൃഥ്വിരാജ് ചവാന് എന്നിവരാണു ഡല്ഹിയിലെത്തിയത്. മഹാരാഷ്ട്രയില് സര്ക്കാര് രൂപീകരിക്കാന് ശിവസേനയ്ക്കു പുറത്തുനിന്നു പിന്തുണ നല്കുന്നതുമായി ബന്ധപ്പെട്ടാണു ചര്ച്ചയെന്നാണു റിപ്പോര്ട്ടുകള്.
No comments