ബി.ജെ.പിയുടെ പ്രധാനമന്ത്രി സ്ഥാനാര്‍ത്ഥി നരേന്ദ്ര മോദി, നിങ്ങളുടെയോ? പ്രതിപക്ഷത്തിന് നേരെ മാസ് ചോദ്യമെറിഞ്ഞ് അമിത് ഷാ
ന്യൂഡല്‍ഹി: ബി.ജെ.പി നേതൃത്വം നല്‍കുന്ന എന്‍.ഡി.എയുടെ പ്രധാനമന്ത്രി സ്ഥാനാര്‍ത്ഥി നരേന്ദ്ര മോദിയാണെന്നും എന്നാല്‍ പ്രതിപക്ഷത്തിന്റെ പ്രധാനമന്ത്രി ആരാണെന്നും ബി.ജെ.പി അദ്ധ്യക്ഷന്‍ അമിത് ഷാ ചോദിച്ചു. പ്രധാനമന്ത്രിയാകണമെന്ന ആഗ്രഹവുമായി നിരവധി പേര്‍ രംഗത്തെത്തുന്നതോടെ പ്രതിപക്ഷ പാര്‍ട്ടികളില്‍ വന്‍ കലാപങ്ങള്‍ നടക്കുമെന്നും അദ്ദേഹം തുറന്നടിച്ചു. ഉത്തര്‍പ്രദേശില്‍ പാര്‍ട്ടി പ്രവര്‍ത്തകരുമായി സംസാരിക്കുകയായിരുന്നു അദ്ദേഹം.
പ്രതിപക്ഷ പാര്‍ട്ടികളുടെ നേതൃത്വത്തിലുള്ള മഹാസഖ്യം അധികാരത്തില്‍ വന്നാല്‍ കുറഞ്ഞത് ആറ് പ്രധാനമന്ത്രിമാരെങ്കിലും ഉണ്ടാകുമെന്ന് അമിത് ഷാ കളിയാക്കി. തിങ്കളാഴ്‌ച മായാവതിയും ചൊവ്വാഴ്‌ച അഖിലേഷ് യാദവും ബുധനാഴ്‌ച മമതാ ബാനര്‍ജിയും വ്യാഴാഴ്‌ച ശരത് പവാറും, വെള്ളിയാഴ്‌ച ദേവ ഗൗഡയും ശനിയാഴ്‌ച മുഹമ്മദ് സലീമും പ്രധാനമന്ത്രിമാരാകും.
ബാക്കിയാകുന്ന ശനിയാഴ്‌ച രാജ്യം ഭരിക്കാന്‍ ആരുമില്ലാതെ ഉറങ്ങുമെന്നും നിറഞ്ഞ കയ്യടികളോടെ അമിത് ഷാ പറഞ്ഞു. സ്വന്തം നേതാവ് ആരാണെന്ന് പോലും അവര്‍ക്ക് അറിയില്ല. ഇത്തരത്തിലുള്ള സഖ്യത്തിന് രാജ്യത്തെ ക്ഷേമത്തിലേക്ക് നയിക്കാനും കഴിയില്ല. 56 ഇഞ്ചിന്റെ നെഞ്ചളവുള്ള മോദിയെപ്പോലൊരു നേതാവിന് മാത്രമേ രാജ്യത്തെ മുന്നോട്ട് നയിക്കാന്‍ കഴിയൂ എന്നും അദ്ദേഹം കൂട്ടിച്ചേര്‍ത്തു.
No comments