ബി.ജെ.പി ഹിന്ദുത്വയെ ഉപയോഗിക്കുന്നത് ഇക്കാര്യത്തിന് വേണ്ടി മാത്രം -സഞ്ജയ് റാവത്ത്..
അധികാരത്തിനുവേണ്ടി മാത്രമാണ് ബി.ജെ.പി ഹിന്ദുത്വയെ ഉപയോഗിക്കുന്നതെന്ന് ശിവസേന നേതാവ് സഞ്ജയ് റാവത്ത്.
ഉത്തരേന്ത്യയില്‍ ബി.ജെ.പിക്കൊപ്പം മത്സരിച്ചില്ലായിരുന്നുവെങ്കില്‍ ശിവസേനയില്‍ നിന്ന് ഒരു പ്രധാനമന്ത്രിയെ രാജ്യം കാണുമായിരുന്നെന്നും സഞ്ജയ് റാവത്ത് പറഞ്ഞു.
"മഹാരാഷ്ട്രയില്‍ ഒന്നുമല്ലാതിരുന്ന ബി.ജെ.പിയെ ശിവസേനയാണ് ഉന്നതിയിലെത്തിച്ചത്. ബാബരിക്ക് ശേഷം ഉത്തരേന്ത്യയില്‍ ശിവസേനക്ക് വലിയ സ്വാധീനമുണ്ടായിരുന്നു. ആ സമയത്ത് ഞങ്ങള്‍ തെരഞ്ഞെടുപ്പില്‍ മത്സരിച്ചിരുന്നെങ്കില്‍, ശിവസേനയില്‍ നിന്ന് ഒരു പ്രധാനമന്ത്രിയെ രാജ്യം കാണുമായിരുന്നു. പക്ഷേ അന്ന് ഞങ്ങള്‍ പ്രധാനമന്ത്രിസ്ഥാനം ബി.ജെ.പിക്ക് നല്‍കുകയാണ് ചെയ്തത്" - സഞ്ജയ് റാവത്ത് പറഞ്ഞു.
ബി.ജെ.പി സഖ്യത്തിനൊപ്പം ചേര്‍ന്നതിനാല്‍ കഴിഞ്ഞ 25 വര്‍ഷം പാഴായിപ്പോയെന്ന് ശിവസേനാ അധ്യക്ഷനും മഹാരാഷ്ട്ര മുഖ്യമന്ത്രിയുമായ ഉദ്ധവ് താക്കറെ നേരത്തെ ആരോപണം ഉന്നയിച്ചിരുന്നു. ഹിന്ദുത്വയുടെ ശക്തി വര്‍ദ്ധിപ്പിക്കാനാണ് ശിവസേന ബി.ജെ.പിക്കൊപ്പം ചേര്‍ന്നതെന്നും എന്നാല്‍ അവര്‍ ഞങ്ങളെ തകര്‍ക്കാനാണ് ശ്രമിച്ചതെന്നുമായിരുന്നു ഉദ്ധവിന്‍റെ പ്രസ്താവന. ഇതിന് മറുപടിയായി, ശിവസേനാ പാര്‍ട്ടി സ്ഥാപകനായ ബാല്‍ താക്കറെയുടെ പാതയിലൂടെയാണോ ഇപ്പോഴത്തെ അധ്യക്ഷന്‍ നടക്കുന്നതെന്ന് ആത്മപരിശോധന നടത്തണമെന്ന് ബി.ജെ.പി നേതാവ് രാം കദം പറഞ്ഞു.
No comments