രണ്ടാം ഘട്ട നോട്ട് നിരോധനത്തിന് മോദി ഒരുങ്ങുന്നുവെന്ന് കോണ്‍ഗ്രസ്..

ന്യൂഡൽഹി: റിസർവ്വ് ബാങ്കിന് മേൽ പിടി മുറുക്കാനുള്ള മോദി സർക്കാരിന്റെ നീക്കം നിരോധനത്തിന്റെ രണ്ടാം ഘട്ടം നടപ്പാക്കുന്നതിന്റെ ഭാഗമായാണെന്ന് കോൺഗ്രസ്. കരുതൽ ധന ശേഖരത്തിൽ നിന്ന് 3.6 ലക്ഷം കോടി വേണമെന്ന് സർക്കാർ ആർ ബി ഐ യോട് ആവശ്യപ്പെട്ടത് ഇതിന്റെ ഭാഗമാണെന്നും കോൺഗ്രസ് വക്താവ് അഭിഷേക് സിങ്വി പറഞ്ഞു. റിസർവ്വ് ബാങ്കിനോട് പണം വാങ്ങി തങ്ങളുടെ അടുപ്പക്കാരായ വ്യവസായികളെയും മറ്റും സഹായിക്കാനാണ് കേന്ദ്ര സർക്കാരിന്റെ നീക്കം. കള്ള ക്കഥകൾ മെനഞ്ഞും തെറ്റായ വസ്തുതകൾ ആവർത്തിച്ചും ആർ ബി ഐ യുടെ വിശ്വാസ്യത തകർക്കാനാണ് സർക്കാർ ശ്രമിക്കുന്നത്. ആർ ബി ഐ യുടെ കരുതൽ ധനം രാജ്യത്തിന്റെ സമ്പത്താണ്. . ഇപ്പോൾ വീണ്ടും നോട്ട്നിരോധനം നടപ്പാക്കാനാണ് സർക്കാരിന്റെ നീക്കം. അതിലൂടെ രാജ്യത്തെ ആഭ്യന്തര ഉല്പാദനത്തിൽ 2 ശതമാനം ഇടിവ് സംഭവിക്കാനാണ് പോകുന്നതെന്നും സിങ്വി കുറ്റപ്പെടുത്തി. റിസർവ്വ് ബാങ്കിന്റെ കരുതൽ ധനത്തിൽ നിന്ന് 3.6 ലക്ഷം കോടി രൂപ വേണമെന്നാണ് സർക്കാർ ആവശ്യപ്പെട്ടത്. ആകെ കരുതൽ ധനത്തിന്റെ 40 ശതമാനം വരും ഈ തുക.