ലോക് സഭ തിരഞ്ഞെടുപ്പ്: തുഷാര്‍ വെള്ളാപ്പള്ളിയെ സ്ഥാനാര്‍ത്ഥിയാക്കണമെന്ന ഉറച്ച നിലപാടില്‍ ബിജെപി
ആലപ്പുഴ: ലോക്‌സഭാ തെരഞ്ഞെടുപ്പില്‍ തുഷാര്‍ വെള്ളാപ്പള്ളിയെ സ്ഥാനാര്‍ത്ഥിയാക്കണമെന്ന ഉറച്ച നിലപാടില്‍ ബിജെപി. എന്നാല്‍ മത്സരിക്കാനില്ലെന്നാണ് തുഷാര്‍ വെള്ളാപ്പള്ളി പറയുന്നത്. ഉഭയകക്ഷി ചര്‍ച്ചയിലൂടെ തുഷാര്‍ മത്സരിക്കാന്‍ സാധ്യതയുണ്ടോയെന്നാണ് രാഷ്ട്രീയ കേരളം
തുഷാറിനെ സ്ഥാനാര്‍ത്ഥിയാക്കുന്നതിലൂടെ ഒരു പരിധിവരെ വെള്ളാപ്പള്ളി നടേശന്റെ ബിജെപിക്കെതിരെയായ പരസ്യ വിമര്‍ശനം കുറയുമെന്നാണ് ബിജെപി നേതൃത്വത്തിന്റെ കണക്കുകൂട്ടല്‍. തുഷാര്‍ മത്സരിക്കുകയാണെങ്കില്‍ കൂടുതല്‍ വോട്ടുകിട്ടാന്‍ സാധ്യതയുള്ള മണ്ഡലങ്ങളിലേതെങ്കിലും നല്‍കാനാണ് ബി ജെ പി തീരുമാനം.
ശബരിമല സ്ത്രീ പ്രവേശന വിഷയത്തിലും വനിതാമതിലിലും വെള്ളാപ്പള്ളി നടേശന്‍ സ്വീകരിച്ച നിലപാടില്‍ സംസ്ഥാനത്തെ എന്‍ ഡി എ നേതൃത്വത്തിന് കടുത്ത അതൃപ്തിയുണ്ട്.
എസ് എന്‍ ഡി പി യോഗം ജനറല്‍ സെക്രട്ടറി കൂടിയായ വെള്ളാപ്പള്ളി നടേശന്റെ നിലപാടിനൊപ്പമാണ് ബിഡിജെഎസിന്റെ വലിയൊരു വിഭാഗം പ്രവര്‍ത്തകരും. വരാനിരിക്കുന്ന ലോക്‌സഭാ തെരഞ്ഞെടുപ്പില്‍ ബിഡിജെഎസ്സിന്റെ പൂര്‍ണ്ണപിന്തുണയുറപ്പിക്കുകയാണ് ബിജെപി ലക്ഷ്യം. കഴിഞ്ഞ നിയമസഭാ തെരഞ്ഞെടുപ്പില്‍ ബി ജെ പി സംസ്ഥാന അദ്ധ്യക്ഷനായിരുന്ന കുമ്മനം രാജശേഖരനടക്കം മത്സര രംഗത്തുണ്ടായിട്ടും സുഭാഷ് വാസുവിനെ മാത്രം മല്‍സരിപ്പിച്ച്‌ തുഷാര്‍ വെള്ളാപ്പള്ളി മാറി നില്‍ക്കുകയായിരുന്നു. ഇത്തവണയും മല്‍സരിക്കുന്നതിനോട് തുഷാറിന് തീരെ താല്പര്യമില്ല.
No comments