ഷുക്കൂര്‍ വധക്കേസ്: സഭയില്‍ പ്രതിപക്ഷ ബഹളം
തിരുവനന്തപുരം: അരിയില്‍ ഷുക്കൂര്‍ വധക്കേസില്‍ സിപിഎം കണ്ണൂര്‍ ജില്ലാ സെക്രട്ടറി പി. ജയരാജന്‍, ടി.വി. രാജേഷ് എം.എല്‍.എ എന്നിവര്‍ക്കെതിരെ സി.ബി.ഐ. കുറ്റപത്രം സമര്‍പ്പിച്ചത് അടിയന്തര പ്രമേയമായി നിയമസഭയില്‍ അവതരിപ്പിക്കാന്‍ നോട്ടീസ് നല്‍കിയത് പരിഗണിക്കാത്തതില്‍ സഭയില്‍ സ്പീക്കറും, പ്രതിപക്ഷവും തമ്മില്‍ വാഗ്വാദം. ജയരാജനെയും, രാജേഷ് എം.എല്‍.എയും 32, 33 പ്രതികളായാണ് സി.ബി.ഐ. തലശ്ശേരി കോടതിയില്‍ നല്‍കിയ കുറ്റപത്രത്തില്‍ പറയുന്നത്.
സഭയില്‍ അംഗങ്ങളായവര്‍ കൊലപാതക കേസില്‍ പ്രതിപ്പട്ടികയില്‍ ഉള്‍പ്പെട്ടതും, രാഷ്ട്രീയ കൊലക്കേസുകളും അതിന്റെ മറ്റു വശങ്ങളും ചര്‍ച്ച ചെയ്യണം എന്നതായിരുന്നു പ്രതിപക്ഷത്തിന്റെ ആവശ്യം.
എന്നാല്‍ കുറ്റപത്രത്തില്‍, സര്‍ക്കാരുമായി നേരിട്ട് ബന്ധമിലല്ലാത്തതിനാല്‍ ചര്‍ച്ച ചെയ്യാനാവില്ലയെന്നായിരുന്നു സ്പീക്കര്‍ എടുത്ത നിലപാട്. എന്നാല്‍ കോടതിയുടെ പരിഗണനിയിലായിരുന്ന വിഷയങ്ങള്‍ മുന്‍പും സഭയില്‍ ചര്‍ച്ചക്ക് വന്നിട്ടുണ്ടെന്നതായിരുന്നു പ്രതിപക്ഷ നേതാവിന്റെ വാദം. സോളാര്‍, കടല്‍ക്കൊല കേസ് തുടങ്ങിയവ ചൂണ്ടിക്കാട്ടിയായിരുന്നു വാദം. എന്നിട്ടും സ്പീക്കര്‍ വഴങ്ങിയില്ല. തുടര്‍ന്ന്, നടുതളത്തിനടുത്തു വരെ പ്രതിപക്ഷ അംഗങ്ങള്‍ വന്നു. ഇതോടെ സഭയുടെ നടത്തിപ്പ് സുഗമം ആവാനുള്ള സാധ്യത മങ്ങുകയാണ്.
അതേസമയം, അരിയില്‍ ഷുക്കൂര്‍ വധക്കേസിന്റെ വിചാരണ തലശേരി കോടതിയില്‍നിന്ന് എറണാകുളത്തെ സിബിഐ കോടതിയിലേക്ക് മാറ്റണമെന്നാവശ്യപ്പെട്ട് കുടുംബം ഹൈക്കോടതിയെ സമീപിക്കും. തലശേരിയില്‍ വിചാരണ നടന്നാല്‍ സാക്ഷികളെ സ്വാധീനിക്കാനുള്ള സാധ്യതയുണ്ടെന്നും പൂര്‍ണമായും നീതി ലഭിക്കില്ലെന്നും ഹര്‍ജിയില്‍ കുടുംബം ചൂണ്ടികാട്ടും. കേരള പൊലീസ് കുറ്റപത്രം തലശേരി കോടതിയില്‍ സമര്‍പ്പിച്ചതു കൊണ്ടാണ് തുടരന്വേഷണം നടത്തിയ സിബിഐയും അനുബന്ധ കുറ്റപത്രം തലശേരിയില്‍ നല്‍കിയത്.
No comments