ന്യൂഡല്‍ഹി: വരുന്ന ലോക്‌സഭാ തെരഞ്ഞെടുപ്പില്‍ ബി.ജെ.പിക്ക് പ്രതീക്ഷയുള്ള സംസ്ഥാനങ്ങളില്‍ നിന്ന് വലിയ തിരിച്ചടി ഉണ്ടാവുമെന്ന് വിലയിരുത്തല്‍. രാജസ്ഥാനിലും മധ്യപ്രദേശിലുമാണ് ബി.ജെ.പി ഏറ്റവും വലിയ പ്രതിസന്ധി നേരിടുന്നത്.
ഛത്തിസ്ഗഡില്‍ ബി.ജെ.പി നിലം തൊടില്ലെന്നും ഇന്റേണല്‍ റിപ്പോര്‍ട്ടുകള്‍ സൂചിപ്പിക്കുന്നു. ഇതോടെ ഭരണം നഷ്ടപ്പെട്ട സംസ്ഥാനങ്ങളില്‍ തിരിച്ചുവരവ് ഉണ്ടാവില്ല.
അതേസമയം കേരളം, ബംഗാള്‍, തമിഴ്‌നാട് തുടങ്ങിയ സംസ്ഥാനങ്ങളില്‍ കൂടുതല്‍ നേട്ടത്തിന് ബി.ജെ.പി ശ്രമിക്കുന്നു. പക്ഷെ ഇവിടെ നിരാശ തന്നെ, അമിത് ഷായുടെ ബൂത്ത് തല പ്രവര്‍ത്തനം ഇവിടെയും മാറ്റത്തിന് സാധ്യതയില്ലെന്നാണ് സൂചന.
ചുരുക്കത്തില്‍ ബി.ജെ.പിക്ക് വിജയസാധ്യത നൂറ് ശതമാനവും ഉറപ്പുള്ള ഒരു സംസ്ഥാനവും ഇപ്പോഴില്ലെന്നാണ് എല്ലാ സര്‍വ്വേയിലും സൂചിപ്പിക്കുന്നത്.
ബിജെപി ഏറ്റവുമധികം പ്രതിസന്ധി നേരിടുന്നത് മധ്യപ്രദേശിലും രാജസ്ഥാനിലുമാണെന്ന് സര്‍വേ വ്യക്തമാക്കുന്നു. അതിന് പുറമെ പാര്‍ട്ടിയുടെ അന്വേഷണത്തിലും ഇത് സത്യമാണെന്ന് തെളിഞ്ഞു.
സംസ്ഥാന തെരഞ്ഞെടുപ്പിലെ തോല്‍വിക്ക് ശേഷം ശക്തരായ നേതാക്കള്‍ രണ്ട് സംസ്ഥാനത്തും ഇല്ലാത്തതാണ് ഏറ്റവും വലിയ തിരിച്ചടിയാവുക. ശിവരാജ് സിംഗ് ചൗഹാനും വസുന്ധര രാജെ സിന്ധ്യും നേതൃത്വസ്ഥാനത്തില്‍ നിന്നും തല്‍ക്കാലം മാറി നില്‍ക്കുകയാണ്.
രണ്ട് സംസ്ഥാനത്തുമായി 54 സീറ്റുകളുണ്ട്. ഗുജറാത്തിലും ഇതേ അവസ്ഥ തന്നെയാണ്. പക്ഷെ അതിനേക്കാള്‍ കോണ്‍ഗ്രസിന് ഇവിടെ ശക്തമായ നേതൃത്വമാണുള്ളത്.
കഴിഞ്ഞ തവണത്തേക്കാള്‍ വോട്ടുനിലയും സീറ്റ് നിലയും കോണ്‍ഗ്രസ് മെച്ചപ്പെടുത്തും. ഗുജറാത്തിലെ 26 സീറ്റില്‍ കോണ്‍ഗ്രസ് 13 സീറ്റ് വരെ നേടുമെന്ന് സര്‍വ്വേ സൂചിപ്പിക്കുന്നു. കഴിഞ്ഞ ദിവസം ഒരു സീ്റ്റ് പോലും ലഭിക്കാത്ത സാഹചര്യത്തില്‍ നിന്നാണ് ഇത്രയും സീറ്റിലേക്കുള്ള കുതിപ്പ്.
അതേസമയം പ്രതിപക്ഷത്തെ വിലകുറച്ച് കണ്ടതാണ് ബി.ജെ.പിയെ പരാജയത്തിലേക്ക് തള്ളിവിടാന്‍ പ്രധാനകാരണമായി സര്‍വ്വേ പറയുന്നത്. എന്നാല്‍ ഇപ്പോള്‍ പ്രതിപക്ഷം ബി.ജെ.പിയേക്കാള്‍ ശക്തമാണെന്ന മുന്നറിയിപ്പും സര്‍വ്വേയില്‍ നല്‍കുന്നുണ്ട്.
എന്നാല്‍ ബി.ജെ.പിയുടെ ഇപ്പോഴുള്ള വീഴ്ചയ്ക്ക് പിന്നില്‍ പ്രധാനമായും സര്‍വ്വേ ഉയര്‍ത്തിക്കാട്ടുന്നത് പൗരത്വ ബില്ലാണ്. പൗരത്വ ബില്ല് വിവാദമുയര്‍ത്താതെ കൊണ്ടുവരാമായിരുന്നുവെന്നാണ് പാര്‍ട്ടിക്കുള്ളില്‍ നിന്നുള്ള വിമര്‍ശനം.
അമിത് ഷായുടെ ബംഗ്ലാദേശി കുടിയേറ്റ പരാമര്‍ശവും അനാവശ്യമായി എന്നും വിമര്‍ശനം ഉയരുന്നുണ്ട്. പ്രധാനമായും ബി.ജെ.പിയിലെ മുതിര്‍ന്ന നേതാക്കള്‍ പല വിഷയങ്ങളിലും വേണ്ട രീതിയില്‍ ഇടപെട്ടില്ലെന്നും വിമര്‍ശനമുണ്ട്.
ദേശീയ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ തന്ത്രങ്ങളെ മോദിക്കും അമിത് ഷായ്ക്കും പ്രതിരോധിക്കാന്‍ കഴിയാത്തതാണ് തെരഞ്ഞെടുപ്പുകളില്‍ ബി.ജെ.പി പരാജയപ്പെടാന്‍ കാരണമെന്നാണ് പാര്‍ട്ടിക്കുള്ളിലെ വിലയിരുത്തല്‍.
മൂന്ന് സംസ്ഥാനങ്ങളിലെ വിജയത്തിന് ശേഷം രാഹുല്‍ മികച്ച നേതാവായി ഉയര്‍ന്നു, മോദിയുടെ വീരപരിവേഷം നഷ്ടപ്പെടുത്തി, ഇതൊക്കെ രാഹുലിന്റെ ജനപ്രീതി വര്‍ദ്ധിക്കാന്‍ കാരണമായതായി ബി.ജെ.പി നേതാക്കള്‍ തന്നെ ചൂണ്ടിക്കാട്ടുന്നു.
അതോടൊപ്പം രാഹുല്‍ എല്ലാ സംസ്ഥാന നേതൃത്വത്തെയും ഒന്നിപ്പിച്ച പ്രവര്‍ത്തിക്കുന്നത് കോണ്‍ഗ്രസ് പ്രവര്‍ത്തകരില്‍ തന്നെ ആവേശം വര്‍ദ്ധിപ്പിക്കുന്നു.
No comments