ശബരിമല നട അടയ്ക്കുന്നതിന് മുന്‍പ് അയ്യപ്പദര്‍ശനത്തിന് യുവതികളുടെ വന്‍ സംഘം എത്തും
പത്തനംതിട്ട: മണ്ഡല മകരവിളക്ക് ഉത്സവം കഴിഞ്ഞ് ശബരിമല നട അടയ്ക്കാന്‍ ഒരുദിവസം ബാക്കി നില്‍ക്കെ ശബരിമലയില്‍ യുവതികളുടെ വന്‍സംഘം എത്തുമെന്ന് സൂചന. നട അടയ്ക്കുന്ന ഞായറാഴ്ചയ്ക്ക് മുമ്ബ് ശബരിമലയിലേക്ക് സംഘങ്ഹളായി യുവതികള്‍ എത്തിയേക്കും എന്നാണ് അഭ്യൂഹങ്ങള്‍ പരക്കുന്നത്.
അതിനിടെ ശബരിമലയില്‍ അവസാന ദിവസങ്ങളില്‍ യുവതീപ്രവേശനം തടയുന്നതിന് വേണ്ടി സംഘപരിവാര്‍ പ്രവര്‍ത്തകര്‍ കൂട്ടമായി എത്തുന്നുണ്ട്. ചലോ ശബരിമല ആഹ്വാനവുമായാണ് ആര്‍.എസ്.എസ് സംഘം ശബരിമലയിലേക്ക് എത്തുന്നത്. സുപ്രിംകോടതി വിധി അനുസരിച്ച്‌ ശബരിമലയില്‍ 51 യുവതികള്‍ കയറിയിട്ടുണ്ട് എന്ന് സര്‍ക്കാര്‍ ഇന്ന് അറിയിച്ചിരുന്നു. ഇതിനിടെയാണ് യുവതികള്‍ വീണ്ടും ശബരിമലയിലേക്ക് വരുന്നതായുള്ള വാര്‍ത്തകള്‍.
നാളെ യുവതികളുടെ പുതിയ സംഘം എത്തുമെന്നും സൂചനയുണ്ട്. കനകദുര്‍ഗയും ബിന്ദുവും അടക്കമുളളവരെ ശബരിമലയിലേക്ക് എത്തിക്കാന്‍ പ്രവര്‍ത്തിച്ച നവോത്ഥാന കേരളം ശബരിമലയിലേക്ക് എന്ന ഫേസ്ബുക്ക് കൂട്ടായ്മയും തമിഴ്‌നാട്ടിലെ മനിതി സംഘടനയും ചേര്‍ന്നാണ് സ്ത്രീകളെ എത്തിക്കുന്നതെന്നാണ് വാര്‍ത്ത. ഒരു ദേശീയ മാദ്ധ്യമമാണ് ഇത് സംബന്ധിച്ച വാര്‍ത്ത പുറത്തുവിട്ടത്. ഇരുപതോളം യുവതികള്‍ ശനിയാഴ്ച മല ചവിട്ടാനെത്തും എന്നാണ് റിപ്പോര്‍ട്ട്. കഴിഞ്ഞ ദിവസം രേഷ്മ നിഷാന്ത്, ഷാനില എന്നീ യുവതികള്‍ അയ്യപ്പദര്‍ശനത്തിന് ശ്രമം നടത്തിയെങ്കിലും പ്രതിഷേധം മൂലം മല കയറാന്‍ സാധിച്ചിരുന്നില്ല.
No comments