ശബരിമല വിഷയത്തില്‍ ആര്‍.എസ്.എസും ബി.ജെ.പിയും രണ്ട് തട്ടില്‍; സമരം അവസാനിപ്പിക്കാന്‍ പാര്‍ട്ടി തീരുമാനം
തിരുവനന്തപുരം∙ ശബരിമല വിഷയത്തില്‍ ബിജെപിക്കുള്ളില്‍ ചേരിതിരിവ്. പാര്‍ട്ടിയുടെ സംഘടനാ വിഷയങ്ങളിലും ശബരിമല സമരത്തിലുമുള്ള ആര്‍എസ്‌എസ് മേല്‍ക്കോയ്‌മയില്‍ ബി.ജെ.പിക്കുള്ളില്‍ അമര്‍ഷം പുകയുന്നുണ്ട്. ശബരിമലയില്‍ നിന്ന് ബിജെപി സമരം സെക്രട്ടേറിയറ്റിലേക്ക് മാറ്റാനുള്ള നിര്‍ദേശം വച്ചത് ആര്‍.എസ്.എസാണ്. ശബരിമല സമരത്തിന് എത്തിയ ബിജെപി നേതാക്കളെ പിന്‍ നിരയിലേക്കു തള്ളിയാണ് സംഘപരിവാര്‍ സംഘടനയായ കര്‍മ്മസമിതിയെത്തിയതും. നിരാഹാര സമരത്തില്‍ ആദ്യമൊക്കെ മുന്‍ നിര നേതാക്കള്‍ പങ്കെടുത്തിരുന്നു. എന്നാല്‍ പിന്നീട് നേതാക്കള്‍ തന്നെ മുഖം തിരിച്ചതോടെ സമരം അപ്രസക്തമായെന്ന അവസ്ഥയായി.
അതേസമയം ശബരിമല വിഷയത്തെ മുന്‍ നിറുത്തി സെക്രട്ടേറിയറ്റിന് മുന്‍പില്‍ നടത്തുന്ന നിരാഹാരസമരം ബിജെപി അവസാനിപ്പിക്കുന്നു.
ഈ മാസം 22ന് സമരം അവസാനിപ്പിക്കും. 21 ന് സംസ്ഥാനത്ത് എത്തുന്ന അമിത് ഷായുമായി ആലോചിച്ചശേഷം മാത്രം സമരം തുടര്‍ന്നും ആവശ്യമാണോ എന്ന് പരിശോധിക്കും. എന്നാല്‍ നിലവിലെ വികാരം അതേപടി നിലനിറുത്താന്‍ സമരവുമായി മുന്നോട്ടുപോകണമെന്ന നിലപാടാണ് ആര്‍.എസ്.എസിനുള്ളത്.
No comments