രാജി വയ്ക്കുന്നതിന് ബി.ജെ.പി വാഗ്ദാനം ചെയ്തത് 30 കോടി, വെളിപ്പെടുത്തലുമായി കര്‍ണാടക എം.എല്‍.എ
കോലാര്‍ : ജെ.ഡി.എസില്‍ നിന്ന് രാജിവയ്ക്കാന്‍ ബി.ജെ.പി 30 കോടി രൂപ നല്‍കാമെന്ന് വാഗ്ദാനം ചെയ്തെന്ന് കര്‍ണാടകയിലെ ഭരണപക്ഷ എം.എല്‍.എയുടെ ആരോപണം. ജനതാദളിന്റെ (എസ്) എം.എല്‍.എ കെ ശ്രീനിവാസ ഗൗഡയാണ് ബി.ജെ.പി പണം വാഗ്ദാനം ചെയ്‌തെന്ന ആരോപണവുമായി രംഗത്തെത്തിയത്. അഡ്വാന്‍സ് എന്ന നിലയില്‍ തനിക്ക് അഞ്ച് കോടി രൂപ നല്‍കിയതായും അദ്ദേഹം പറഞ്ഞു.
ബി.ജെ.പി നേതാക്കളായ സി.എന്‍. അശ്വത് നാരായണ്‍, എസ്.ആര്‍. വിശ്വനാഥ്, സി.പി. യോഗേശ്വര എന്നിവര്‍ തന്റെ വീട്ടില്‍ വന്നാണ് ഇക്കാര്യം സംസാരിച്ചതെന്നും ശ്രീനിവാസ ഗൗഡ വെളിപ്പെടുത്തി. അവിടെവെച്ച്‌ അഞ്ചു കോടി രൂപ തന്നെന്നും ശ്രീനിവാസ ഗൗഡ പറഞ്ഞു.
ജെ.ഡി.എസില്‍ നിന്ന് രാജിവയ്ക്കണമെന്നായിരുന്നു അവരുടെ ആവശ്യം.
എന്നാന്‍ തന്റെ പാര്‍ട്ടിയോട് വിശ്വസ്തനാണെന്നും ഒരിക്കലും രാജിവയ്ക്കില്ലെന്നും പറഞ്ഞു. തനിക്കു തന്ന പണം തിരികെ കൊണ്ടുപോകാനും അവരോട് ആവശ്യപ്പെട്ടു. ഇക്കാര്യം എച്ച്‌.ഡി കുമാരസ്വാമിയോട് പറയുകയും ചെയ്തു - ശ്രീനിവാസ ഗൗഡ വ്യക്തമാക്കി.
കര്‍ണാടകത്തിലെ ജെ.ഡി.എസ് - കോണ്‍ഗ്രസ് സര്‍ക്കാരിനെ താഴെയിറക്കാന്‍ ബി.ജെ.പി സംസ്ഥാന അദ്ധ്യക്ഷന്‍ ബി.എസ്. യദിയൂരപ്പ കോണ്‍ഗ്രസ് എം.എല്‍.എമാരെ വിലകൊടുത്തു വാങ്ങാന്‍ ശ്രമിക്കുന്നതായി കോണ്‍ഗ്രസും ഇന്നലെ ആരോപിച്ചിരുന്നു.
No comments