കേരള രാഷ്ട്രീയം ബി.ജെ.പിയില്‍ കേന്ദ്രീകരിക്കുന്നു - ശ്രീധരന്‍ പിള്ള
തിരുവനന്തപുരം• കേരള രാഷ്ട്രീയം ബി.ജെ.പി കേന്ദ്രീകൃതമായി മാറിയെന്ന് അഡ്വ. പി.എസ്‌. ശ്രീധരന്‍ പിള്ള. സി.പി.എം - കോണ്‍ഗ്രസ് നേതാക്കള്‍ കഴിഞ്ഞ കുറെ ദിവസങ്ങളായി പരസ്പരം ആരോപിക്കുന്ന ബി.ജെ.പിയുമായുള്ള രഹസ്യ ധാരണയെ പറ്റിയുള്ള വായ്ത്താരി കേരളത്തില്‍ രാഷ്ട്രീയം ബി.ജെ.പി കേന്ദ്രീകൃതമായി മാറിയെന്നതിന്റെ സൂചനയാണ്. ഇരു കക്ഷികള്‍ക്കും അവര്‍ നയിക്കുന്ന ഇടത് - വലത് മുന്നണികള്‍ക്കും ഇപ്പോള്‍ ബി.ജെ.പിയെ ഭയമാണ്.ആ ഭയം ലോക് സഭാ തെരെഞ്ഞെടുപ്പ് അടുത്തതോടെ മൂര്‍ച്ഛിച്ചിരിക്കുന്നു.അത് കൊണ്ടാണ് സിപിഎം,കോണ്‍ഗ്രസ് നേതാക്കള്‍ ബി.ജെ.പിയെ കുറിച്ച്‌ പിച്ചും പേയും പറയുന്നത്.
കേരളത്തില്‍ ബി.ജെ.പി വളര്‍ന്നത് വര്‍ധിച്ച ജനപിന്തുണ മൂലമാണ്.
അല്ലാതെ സി.പി.എമ്മിന്റെയോ കോണ്‍ഗ്രസ്സിന്റെയോ ഒത്താശയോ ഔദാര്യമോ മൂലമല്ല. ഇരുമുന്നണികളുടെയും ജനം തിരിച്ചറിഞ്ഞു കഴിഞ്ഞു. ഇനി ജനങ്ങളെ ഈ മുന്നണികള്‍ക്ക് കബളിപ്പിക്കാനാവില്ല. ബി.ജെ.പിയുമായി രഹസ്യധാരണ ഉണ്ടെന്ന വാചോടാപം സി.പി.എം നേതാക്കളും കോണ്‍ഗ്രസ് നേതാക്കളും ഇനിയെങ്കിലും മതിയാക്കാന്‍ ബി.ജെ.പി സംസ്ഥാന അധ്യക്ഷന്‍ പ്രസ്താവനയില്‍ ആവശ്യപ്പെട്ടു.
ബി.ജെ.പിയെ ഭയന്ന് കോണ്‍ഗ്രസ്സും സി.പി.എമ്മും ചില സംസ്ഥാനങ്ങളില്‍ പരസ്യമായും ചിലയിടങ്ങളില്‍ രഹസ്യമായും ധാരണയിലാണെന്നത് പകല്‍ പോലെ വ്യക്തമാണ്- പിള്ള പറഞ്ഞു.
No comments