സബ് കളക്ടറെ അപമാനിച്ച സംഭവം; എസ് രാജേന്ദ്രന്‍ എം.എല്‍.എയോട് സി.പി.എം വിശദീകരണം തേടും
ഇടുക്കി: ദേവികുളം എം.എല്‍.എ എസ്. രാജേന്ദ്രന്‍ സബ് കളക്ടര്‍ രേണുരാജിനോട് അപമര്യാദയായി സംസാരിച്ച സംഭവത്തില്‍ വിശദീകരണം തേടുമെന്ന് സി.പി.എം. തെറ്റായ പെരുമാറ്റം പാര്‍ട്ടിയ്ക്ക് അംഗീകരിക്കാനാകില്ലെന്ന് സി.പി.എം ഇടുക്കി ജില്ലാ സെക്രട്ടറി കെ.കെ ജയചന്ദ്രന്‍ പറഞ്ഞു.
എം.എല്‍.എയോട് വിശദീകരണം തേടുമെന്നും സബ് കളക്ടറോട് സംസാരിച്ചത് ശരിയായ രീതിയിലാണോയെന്ന് പരിശോധിക്കുമെന്നും അദ്ദേഹം പറഞ്ഞു. കൈയ്യേറ്റവുമായി ബന്ധപ്പെട്ട നിയമപരമായ നടപടികളില്‍ ഇടപെടില്ലെന്നും ജയചന്ദ്രന്‍ വ്യക്തമാക്കി.
അതേസമയം, എസ് രാജേന്ദ്രന്‍ എം.എല്‍.എയെ തള്ളി സി.പി.ഐ ഇടുക്കി ജില്ലാ സെക്രട്ടറിയും രംഗത്തുവന്നു. അനധികൃത നിര്‍മ്മാണത്തിന് കൂട്ടുനില്‍ക്കുന്നത് അംഗീകരിക്കാനാകില്ലെന്ന് കെ.കെ ശിവരാമനും പറഞ്ഞു.
മോശം പരാമര്‍ശം നടത്തിയ എം.എല്‍.എയെ സി.പി.എം നിയന്ത്രിക്കണം. അനധികൃത നിര്‍മാണത്തിന് കൂട്ടുനില്‍ക്കുന്നത് അംഗീകരിക്കാനാവില്ല. പഞ്ചായത്ത് നിയമത്തെ വെല്ലുവിളിക്കുകയാണെന്നും ശിവരാമന്‍ കൂട്ടിച്ചേര്‍ത്തു.
No comments