മമതയുടെ ലക്ഷ്യം അടുത്ത പ്രധാനമന്ത്രി- മോഡി

കൊൽക്കത്ത: ബംഗാളിലെ ജനങ്ങളെ സിൻഡിക്കേറ്റുകൾക്ക് വിട്ട് കൊടുത്ത് മമത പ്രധാനമന്ത്രിയാവാൻ നോക്കുകയാണെന്ന് പ്രധാനമന്ത്രി നരേന്ദ്രമോദി. പാവപ്പെട്ടവരുടെ പണം കൊള്ളയടിക്കുന്നവരെ സംരക്ഷിക്കാനായി ആദ്യമായാണ് ഒരു മുഖ്യമന്ത്രി ധർണ നടത്തുന്നത്. നുഴഞ്ഞുകയറ്റക്കാരെ സ്വാഗതം ചെയ്യുന്ന മമത സർക്കാർ  ബി.ജെ.പി നേതാക്കളെ തടയുകയാണ്. തൃണമൂൽ ഭയന്നതിൻെറ സൂചനയാണ് ഇതെന്നും മോദി പറഞ്ഞു. ബംഗാളിലെ മായാനഗുരിയിൽ ദേശീയപാത 31ഡി വിഭാഗം നവീകരണ പ്രവർത്തികൾ തറക്കല്ലിട്ട് നടത്തിയ പ്രസംഗത്തിലാണ് മോദിയുടെ വിമർശം. കമ്യൂണിസ്റ്റുകാരുടെ കാൽപ്പാടുകളാണ് മമത സർക്കാറും പിന്തുടരുന്നത്. മമത ഇപ്പോൾ പേടിച്ചിരിക്കുകയാണ്. എന്നയെല്ല അവർക്ക് ഭയം, ബംഗാൾ ജനതയെ ആണ് ഭയം.

ബംഗാളിലും ത്രിപുര ആവർത്തിക്കുമെന്ന് പ്രധാനമന്ത്രി പറഞ്ഞു. വടക്കൻ ബംഗാളിനെ മുൻ സംസ്ഥാന സർക്കാരുകളെല്ലാം അവഗണിക്കുകയായിരുന്നു. ഈ മേഖലയിലെ സുസ്ഥിര വികസനത്തിന് സർക്കാർ ഒരിക്കലും ശ്രദ്ധ നൽകിയില്ല. നിങ്ങൾക്ക് ലഭിക്കുന്ന എല്ലാ സൗകര്യങ്ങളും കേന്ദ്രം തരുന്നതാണെന്ന് മോദി അവകാശപ്പെട്ടു. പാവപ്പെട്ടവർക്ക് ഏറ്റവും മികച്ച സൗകര്യങ്ങൾ നൽകാൻ കേന്ദ്ര സർക്കാർ എല്ലാ ശ്രമങ്ങളും നടത്തിക്കൊണ്ടിരിക്കുകയാണ്. മുത്തലാഖ് ബില്ലിനെ പാർലമെന്റിൽ എതിർക്കാൻ കോൺഗ്രസ് ശ്രമിക്കുന്നു എന്ന് മാത്രമല്ല, ബില്ലിനെ മുഴുവനായും തകർക്കാനാണ് അവർ ശ്രമിക്കുന്നത്. എന്നാൽ മുസ്ലീം സഹോദരിമാർക്കായി താനത് നടപ്പാക്കും.

കോൺഗ്രസ്സിന് കർഷകർ വെറും വോട്ട് ബാങ്ക് മാത്രമാണ്. ഞാൻ ചോദിക്കട്ടേ നിങ്ങൾക്ക് എത്രപേർക്ക് കർഷക ആനുകൂല്യങ്ങൾ കിട്ടി? നിങ്ങളുടെ കാർഷിക വായ്പകൾ എഴുതിത്തള്ളിയോ? അവർ വോട്ടുകൾ നേടി, കർഷകർ അവർക്ക് വിഷയമല്ല. തന്നെ അപമാനിക്കാൻ കോൺഗ്രസ് നേതാക്കൾ രംഗത്തെത്തിയിരിക്കുന്നു. അവരുടെ അജണ്ട അഴിമതി നടത്തുകയും അത് ചെയ്യുന്നവരെ സഹായിക്കലും ആണ്. എന്നാൽ, ചൗക്കിദാർ ജാഗ്രതയോടെയാണെന്ന് ഞാൻ അവരോട് പറയുന്നതായും മോദി പറഞ്ഞു.