കർണാടകയിൽ കുതിരക്കച്ചവടം തുടരുന്നു.. പോര്..

ബംഗളൂരു: ജെ.ഡി.എസ്​ എം.എൽ.എയെ സ്വാധീനിക്കാൻ കർണാടകയിലെ ബി.ജെ.പി നേതാവ്​ യെദ്യൂരിയപ്പ ശ്രമിച്ചുവെന്ന ആരോപണവുമായി മുഖ്യമന്ത്രി എച്ച്​.ഡി കുമാരസ്വാമി. ഇതുമായി ബന്ധപ്പെട്ട്​ വോയ്​സ്​ ക്ലിപ്പും കുമാരസ്വാമി പുറത്ത്​ വിട്ടു. ജെ.ഡി.എസ്​ എം.എൽ.എയായ നാഗൻ ഗൗഡയെ സ്വാധീനിക്കാൻ ശ്രമം നടന്നുവെന്നാണ്​ കുമാരസ്വാമിയുടെ ആരോപണം. പ്രധാനമന്ത്രി നരേന്ദ്രമോദിയുടെ അറിവോടെയാണ്​ ഇക്കാര്യം ചെയ്​തതെന്നും കുമാരസ്വാമി ആരോപിക്കുന്നു.

എം.എൽ.എയുടെ മകനും യെദ്യൂരിയപ്പയും തമ്മിലുള്ള സംഭാഷണമാണ്​ കുമാരസ്വാമി പുറത്ത്​ വിട്ടത്​. 25 ലക്ഷം രൂപ എം.എൽ.എക്ക്​ നൽകാമെന്നും ബി.ജെ.പി അധികാരത്തിലെത്തിയാൽ മന്ത്രിപദം കൊടുക്കുമെന്നുമായിരുന്നു യെദ്യൂരിയപ്പയുടെ വാഗ്​ദാനം. അതേസമയം കുമാരസ്വാമി പുറത്ത്​ വിട്ട വോയ്​സ്​ ക്ലിപ്പ്​ വ്യാജമാണെന്ന്​ യെദ്യൂരിയപ്പ പ്രതികരിച്ചു.

സംസ്ഥാന ബജറ്റ്​ അവതരിപ്പിക്കുന്നതിന്​ തൊട്ട്​ മുമ്പാണ്​ കുമാരസ്വാമി ഇക്കാര്യത്തിൽ വാർത്താ സമ്മേളനം നടത്തിയത്​. ഒമ്പത്​ മാസം പഴക്കമുള്ള ജെ.ഡി.എസ്​-കോൺഗ്രസ്​ സഖ്യസർക്കാറി​നെ വീഴ്​ത്താനുള്ള ശ്രമത്തിലാണ്​ ബി.ജെ.പി.