കോണ്‍ഗ്രസില്‍ സീറ്റുറപ്പിച്ച് സിറ്റിംഗ് എം പിമാര്‍ ? എതിര്‍പ്പുള്ളത് കെ വി തോമസിന്റെയും ആന്‍റോ ആന്റണിയുടെയും കാര്യത്തില്‍ മാത്രം. തിരുവനന്തപുരത്ത് ശശി തരൂരിനോട് എതിരില്ല. കോണ്‍ഗ്രസില്‍ സീറ്റ് ചര്‍ച്ചകള്‍ പുരോഗമിക്കുന്നു
പത്തനംതിട്ടയില്‍ ആന്‍റോ ആന്റണിയുടെയും എറണാകുളത്ത് കെ വി തോമസിന്റെയും കാര്യത്തില്‍ ശക്തമായ എതിര്‍പ്പുകള്‍ ഉണ്ടെങ്കിലും മത്സരിക്കാനാഗ്രഹിക്കുന്ന സിറ്റിംഗ് എം പിമാര്‍ക്ക് ഇത്തവണയും ഭീഷണി ഉണ്ടാകില്ലെന്നാണ് റിപ്പോര്‍ട്ട്.
തിരുവനന്തപുരത്തെ സംബന്ധിച്ച് തിരുവനന്തപുരം യു ഡി എഫിന്റെ സേവ് സോണില്‍ ഉള്‍പ്പെടുന്ന മണ്ഡലമല്ല. മുമ്പ് രണ്ടു തവണ മത്സരിച്ച തരൂര്‍ ആദ്യം 1 ലക്ഷത്തോളം ഭൂരിപക്ഷം നേടിയെങ്കില്‍ കഴിഞ്ഞ വര്‍ഷം ഭൂരിപക്ഷം 15470 ലേക്ക് ഒതുങ്ങി. വിജയിച്ചത് കഷ്ടിച്ച് മാത്രം.
മാത്രമല്ല, രണ്ടാം സ്ഥാനത്തെത്തിയ ഇടതുപക്ഷ സ്ഥാനാര്‍ഥിയും ബി ജെ പിയും തമ്മില്‍ കഷ്ടി 30000 വോട്ടുകളുടെ വ്യത്യാസം മാത്രമാണ് ഉള്ളത്. അതും സീറ്റ് വില്‍പ്പനയുടെ പേരില്‍ ഇടത് സ്ഥാനാര്‍ഥി വിവാദങ്ങളില്‍ അകപ്പെട്ട സാഹചര്യത്തില്‍ ആയിരുന്നു.
എറണാകുളത്ത് കെ വി തോമസിനെ സംബന്ധിച്ച് ഇനിയെങ്കിലും യുവാക്കള്‍ക്ക് അവസരം ഒരുക്കിക്കൂടെ എന്നാണ് ഉയരുന്നത്. എട്ടോളം തെരഞ്ഞെടുപ്പുകളില്‍ മത്സരിക്കുകയും കേരളത്തിലും കേന്ദ്രത്തിലും മന്ത്രിയാവുകയും പല തവണ എം പിയും എം എല്‍ എ ഒക്കെ ആകുകയും ചെയ്ത കെ വി തോമസ്‌ ഒഴിഞ്ഞുകൊടുക്കണമെന്ന വാശിയിലാണ് യൂത്ത് കോണ്‍ഗ്രസ്.
മാത്രമല്ല, കൊച്ചിയില്‍ മോഡിയെ പുകഴ്ത്തി പ്രസംഗിച്ചെന്ന ആക്ഷേപം കെ വിക്കെതിരെ വേറെയുമുണ്ട്. മോഡി ഭക്തനായ ഒരാള്‍ മത്സരിക്കുമ്പോള്‍ തങ്ങളെങ്ങനെ പ്രധാനമന്ത്രിയെയും ബി ജെ പിയെയും വിമര്‍ശിക്കും എന്നതാണ് ജില്ലയിലെ കോണ്‍ഗ്രസ് നേതാക്കള്‍ ഉന്നയിക്കുന്നത്. ഇതൊക്കെ കെ വി തോമസിന് പ്രതിബന്ധങ്ങള്‍ തന്നെയാണ്.
പത്തനംതിട്ടയില്‍ ആന്‍റോ ആന്റണിയോടുള്ള എതിര്‍പ്പ് കഴിഞ്ഞ തവണ തന്നെ ഉണ്ടായിരുന്നതാണ്. 2009 ല്‍ ഒന്നേകാല്‍ ലക്ഷം വോട്ടുകള്‍ക്ക് വിജയിച്ച മണ്ഡലത്തില്‍ കഴിഞ്ഞ തവണ ആ ഭൂരിപക്ഷം ആന്‍റോ ആന്റണിക്ക് അന്‍പതിനായിരത്തില്‍ താഴെയായി കുറഞ്ഞു.
വടകരയില്‍ മുല്ലപ്പള്ളിക്ക് പകരക്കാരനെ കണ്ടെത്തുകയാണ് ദുഷ്കരം. അവിടെ കെ എസ് യു അധ്യക്ഷന്‍ കെ എം അഭിജിത്തിന്റെ പേര് സജീവ പരിഗണനയില്‍ ഉണ്ടെങ്കിലും കൂടുതല്‍ ശക്തമായ പേരുകള്‍ പരിഗണിക്കപ്പെടേണ്ടതായിട്ടുണ്ടെന്നാണ് വിലയിരുത്തല്‍. ജാതി സമവാക്യങ്ങള്‍ ഉള്‍പ്പെടെ പരിഗണിക്കപ്പെടുന്ന മണ്ഡലങ്ങളില്‍ ഒന്നാണ് വടകര.
രാഷ്ട്രീയമായി യു ഡി എഫിനേക്കാള്‍ ഇടത് പക്ഷത്തിന് മുന്‍തൂക്കമുള്ള മണ്ടലം. മാത്രമല്ല, കഴിഞ്ഞ തവണ ഒപ്പമുണ്ടായിരുന്ന ജനതാദള്‍ ഇത്തവണ മറുപക്ഷത്താണ്. വടകരയില്‍ മാത്രം ഇവര്‍ക്ക് അന്‍പതിനായിരത്തോളം വോട്ടുകള്‍ ഉണ്ടെന്നാണ് അവകാശവാദം.
കോണ്‍ഗ്രസുകാര്‍ സുരക്ഷിത മണ്ഡലമായി കരുതുന്ന വയനാട്ടില്‍ സ്ഥനാര്തിത്വത്തിനായി മുന്‍ കെ പി സി സി പ്രസിഡന്റ് വരെയുള്ളവര്‍ രംഗത്തുണ്ട്. ഇവിടെ തുടക്കം മുതല്‍ പറഞ്ഞുകേട്ടിരുന്ന പേര് കോഴിക്കോട് ഡി സി സി അധ്യക്ഷന്‍ ടി സിദ്ദിഖിന്റെതായിരുന്നു. ആ സ്ഥാനത്തേക്കാണ് ഇപ്പോള്‍ എം എം ഹസ്സനും വനിതാ പ്രാതിനിധ്യത്തിന്റെ പേരില്‍ ഷാനിമോള്‍ ഉസ്മാനുമൊക്കെ കയറി വന്നിരിക്കുന്നത്.
മാവേലിക്കരയില്‍ കൊടിക്കുന്നില്‍ സുരേഷിന് കാര്യമായ എതിര്‍പ്പുകള്‍ ഒന്നുമില്ല. കൊടിക്കുന്നില്‍ ആദ്യം സംസ്ഥാന രാഷ്ട്രീയത്തിലേക്ക് മാറാന്‍ ആലോചിച്ചിരുന്നെങ്കിലും പിന്നീട് ഇദ്ദേഹം കേന്ദ്രം മതിയെന്ന് തീരുമാനിക്കുകയായിരുന്നു.
കേന്ദ്രത്തിലെത്തിയ പിന്നോക്ക വിഭാഗത്തില്‍ നിന്നുള്ള ഏറ്റവും സീനിയര്‍ നേതാവെന്ന നിലയില്‍ കേന്ദ്ര ക്യാബിനറ്റ് റാങ്ക് പദവി വരെ ലഭിച്ചേക്കാം എന്നതാണ് കൊടിക്കുന്നിലിന്റെ മനംമാറ്റത്തിന് കാരണം.
No comments