കൊറോണയെ തടയാന്‍ ഓം നമഃ ശിവായ ചൊല്ലി ദേഹത്ത് ചാണകം പുരട്ടൂ...!!

ആഗോള തലത്തില്‍ ഭീഷണി ഉയര്‍ത്തി പടര്‍ന്നുപിടിക്കുന്ന കൊറോണ വൈറസ് ബാധ ചികിത്സിച്ചുമാറ്റാനുള്ള മരുന്ന് വികസിപ്പിക്കാനുള്ള ഗവേഷണം ശാസ്ത്രലോകം തുടരുകയാണ്.

ഇതിനിടെ കൊറോണ വൈറസ് ബാധയ്ക്ക് വിചിത്ര ചികിത്സാ വാദവുമായി ഹിന്ദുമഹാസഭാ അധ്യക്ഷന്‍ സ്വാമി ചക്രപാണി മഹാരാജ് രംഗത്തെത്തിയിരിക്കുകയാണ്.

ചാണകവും ഗോമൂത്രവും ഉപയോഗിച്ച്‌ രോഗബാധ ചികിത്സിച്ചു മാറ്റാമെന്നാണ് ചക്രപാണി മഹാരാജിന്റെ വാദം. നോവല്‍ കൊറോണ വൈറസിനെ കൊല്ലാനും ലോകത്ത് അത് കൊണ്ടുണ്ടായ പ്രത്യാഘാതങ്ങള്‍ ഇല്ലാതാക്കാനും പ്രത്യേക യാഗം നടത്തുമെന്നും ചക്രപാണി പറഞ്ഞു.

'ഗോമൂത്രവും ചാണകവും ഉപയോഗിക്കുന്നത് രോഗം പരത്തുന്ന കൊറോണ വൈറസിനെ തടയും.

ഓം നമഃ ശിവായ ചൊല്ലി ദേഹത്ത് ചാണകം തേച്ചു പുരട്ടൂ, രക്ഷപ്പെടും. ഒരു പ്രത്യേക യാഗവും പെട്ടെന്നു തന്നെ വൈറസിനെ കൊല്ലാനായി നടത്തുന്നുണ്ട്,' ചക്രപാണി പറഞ്ഞു.