കേരള ഗവര്‍ണര്‍; അവസാന റൗണ്ടില്‍ മുന്‍ സംസ്ഥാന പൊലീസ് മേധാവിയും

പി സദാശിവം കേരള ഗവര്‍ണര്‍ സ്ഥാനം ഒഴിയാന്‍ ഇനി ദിവസങ്ങള്‍ മാത്രമാണ് ബാക്കിയുള്ളത്. ഇതോടെ കേരള ഗവര്‍ണറായി ഇനി ആരെത്തും എന്നുള്ള ചര്‍ച്ചകള്‍ തുടങ്ങി കഴിഞ്ഞു. ബിജെപി കേന്ദ്ര നേതൃത്വം പി സദാശിവത്തിന്റെ കാലാവധി നീട്ടി നല്‍കാന്‍ സാധ്യത ഉണ്ടെന്നുള്ള റിപ്പോര്‍ട്ടുകള്‍ ഉണ്ട്. രാജ്യത്ത് 13 ഗവര്‍ണര്‍മാരുടെ പദവികള്‍ ഒഴിഞ്ഞ് കിടക്കുന്ന സാഹചര്യത്തില്‍ മറ്റ് സംസ്ഥാനങ്ങളിലേക്ക് അദ്ദേഹത്തെ പരിഗണിക്കാനുള്ള സാധ്യതയും തള്ളി കളയുന്നില്ല.

അതേസമയം സദാശിവം പോയാല്‍ കേരള ഗവര്‍ണര്‍ സ്ഥാനത്തേക്ക് നിയമിതനാകാന്‍ സാധ്യതയുള്ള വ്യക്തികളുടെ പേരുകളാണിപ്പോള്‍ ചര്‍ച്ചയാകുന്നത്. മുന്‍ ഡി.ജി.പി ടി.പി. സെന്‍കുമാര്‍, ബി.ജെ.പി മുന്‍ സംസ്ഥാന പ്രസിഡന്റ് കുമ്മനം രാജശേഖരന്‍ തുടങ്ങിയ പേരുകള്‍ ഗവര്‍ണര്‍ സ്ഥാനത്തേക്ക് പരിഗണിക്കപ്പെടുമെന്ന് പാര്‍ട്ടി വൃത്തങ്ങള്‍ പറയുന്നു.