പഞ്ചാബ് മുഖ്യമന്ത്രി സ്ഥാനത്തേക്ക് അവസാന നിമിഷം ട്വിസ്റ്റ്..!! രണ്ധാവെയ്ക്ക് പകരം ചരണ് സിംഗ് ചന്നിയെ മുഖ്യമന്ത്രിയാക്കി ഹൈക്കമാന്റ്..!! സിധുവിനും ക്യാപ്റ്റനും..
പഞ്ചാബ് മുഖ്യമന്ത്രിയായി സുഖ്ജീന്തര് സിംഗ് രണ്ധാവയെ പ്രഖ്യാപിക്കുമെന്ന അറിയിപ്പ് മണിക്കൂറുകള്ക്കകം മാറ്റി കോണ്ഗ്രസ് വൃത്തങ്ങള്.
ചരണ് സിംഗ് ചന്നിയാണ് പുതിയ മുഖ്യമന്ത്രിയാകുകയെന്ന് ഹൈക്കമാന്റ് അറിയിച്ചു. രണ്ധാവയുടെ പേര് പ്രഖ്യാപിച്ചയുടന് സിദ്ദു പ്രതിഷേധിക്കുകയും ചന്നിയെ മുഖ്യമന്ത്രിയാക്കാന് ആവശ്യപ്പെടുകയുമായിരുന്നുവെന്നാണ് വിവരം. തുടര്ന്ന് ചന്നിയെ നിയമസഭാ കക്ഷി നേതാവായി തിരഞ്ഞെടുത്തതായി സംസ്ഥാന ചുമതലയുളള എഐസിസി സെക്രട്ടറി ഹരീഷ് റാവത്ത് അറിയിച്ചു.
ചന്നിയെ താന് പിന്തുണയ്ക്കുന്നതായും എഐസിസി തീരുമാനം അംഗീകരിക്കുന്നതായും സുഖ്ജീന്തര് സിംഗ് രണ്ധാവെ അറിയിച്ചു. താനല്ല ആരാണ് മുഖ്യമന്ത്രിയെന്ന് വൈകാതെ അറിയാമെന്നായിരുന്നു ആദ്യം രണ്ധാവ അറിയിച്ചത്. പുതിയതായി രണ്ട് ഉപമുഖ്യമന്ത്രിമാരെയും തിരഞ്ഞെടുക്കും. ജാതിസമവാക്യങ്ങള് പാലിച്ചാകും ഈ പേരുകള് തിരഞ്ഞെടുക്കുകയെന്നാണ് വിവരം. ക്യാപ്റ്റന് അമരീന്ദര് സിംഗ് സര്ക്കാരില് സാങ്കേതിക വിദ്യാഭ്യാസ മന്ത്രിയായിരുന്നു 58കാരനായ ചന്നി. ചംകൗര് സാഹെബ് മണ്ഡലത്തിലെ എംഎല്എയായ അദ്ദേഹം സംസ്ഥാനത്തെ മുഖ്യമന്ത്രിയാകുന്ന ആദ്യ ദളിത് നേതാവാണ്. 2015-16 സമയത്ത് പ്രതിപക്ഷ നേതാവായിരുന്നു ചന്നി.
പഞ്ചാബ് കോണ്ഗ്രസ് അദ്ധ്യക്ഷന് നവ്ജ്യോത് സിംഗ് സിദ്ദുവിനെയോ, മുന് പിസിസി അദ്ധ്യക്ഷന് സുനില് ജഘറോ മുഖ്യമന്ത്രിയാകുമെന്ന് ആദ്യഘട്ട ആലോചന നടന്നു. പിന്നീട് വനിതാ മുഖ്യമന്ത്രിയാകും സംസ്ഥാനത്തുണ്ടാകുക എന്ന് വാര്ത്തകളുണ്ടായിരുന്നു. മുതിര്ന്ന കോണ്ഗ്രസ് നേതാവ് അംബികാ സോണിയുടെ പേരാണ് ഉയര്ന്നുകേട്ടത്. എന്നാല് അംബികാ സോണി സ്ഥാനം ഏറ്റെടുക്കാന് വിമുഖത പ്രകടിപ്പിച്ചു. 2022 മാര്ച്ച് വരെയാണ് പുതിയ മുഖ്യമന്ത്രിയുടെ കാലാവധി.
No comments