തൃണമൂൽ കോൺഗ്രസ് പിളരുന്നു..?? മമതയും അനന്തരവനും തമ്മില്‍ ഭിന്നത പാര്‍ട്ടിക്ക് പുതിയ ദേശീയ കമ്മിറ്റിയെ പ്രഖ്യാപിച്ചു..
പാര്‍ട്ടിയില്‍ 'ഒരാള്‍ക്ക് ഒരു പദവി' എന്ന നയത്തെ ചൊല്ലി ബംഗാള്‍ മുഖ്യമന്ത്രി മമത ബാനര്‍ജിയും അനന്തരവന്‍ അഭിഷേക് ബാനര്‍ജിയും തമ്മില്‍ അഭിപ്രായ വ്യത്യാസം രൂക്ഷമെന്ന് റിപ്പോര്‍ട്ടുകള്‍ പ്രചരിക്കവെ, പാര്‍ട്ടിക്ക് പുതിയ 20 അംഗ ദേശീയ കമ്മിറ്റിയെ പ്രഖ്യാപിച്ചു.
ഒരാള്‍ക്ക് ഒരു പദവിയെന്ന അഭിഷേകിന്റെ നയത്തെ എതിര്‍ത്ത് ഒന്നിലധികം പദവികള്‍ വഹിക്കുന്ന മുതിര്‍ന്ന നേതാക്കള്‍ രംഗത്തെത്തിയതോടെ, ഇന്നലെ മുതിര്‍ന്ന നേതാക്കളെ വിളിച്ചുകൂട്ടി മമത ബാനര്‍ജിയുടെ വീട്ടില്‍ യോഗം ചേര്‍ന്നിരുന്നു
ശേഷമാണ് പുതിയ ദേശീയ പ്രവര്‍ത്തക സമിതിയെ പ്രഖ്യാപിച്ചത്. സമിതി ഭാരവാഹികളെ പിന്നീട് പ്രഖ്യാപിക്കുമെന്ന് മുതിര്‍ന്ന തൃണമൂല്‍ നേതാവ് പാര്‍ത്ഥ ചാറ്റര്‍ജി മാദ്ധ്യമങ്ങളോട് പറഞ്ഞു.
'പാര്‍ട്ടിയുടെ അദ്ധ്യക്ഷയായി മമത ബാനര്‍ജി വീണ്ടും തിരഞ്ഞെടുക്കപ്പെട്ടതിന് ശേഷം, പാര്‍ട്ടി കാര്യങ്ങള്‍ നോക്കാന്‍ ഒരു ചെറിയ കമ്മിറ്റിയെ അവര്‍ പ്രഖ്യാപിച്ചിരുന്നു. ഇന്ന് ആ കമ്മിറ്റിയുടെ ഒരു യോഗം ഉണ്ടായിരുന്നു. ഇതിലാണ് അവര്‍ പുതിയ ദേശീയ പ്രവര്‍ത്തക സമിതിയെ പ്രഖ്യാപിച്ചത്.'-ചാറ്റര്‍ജി പറഞ്ഞു.
തിരഞ്ഞെടുപ്പ് തന്ത്രജ്ഞന്‍ പ്രശാന്ത് കിഷോറിന്റെ ഐപാക് സംഘടനയുമായി ബന്ധപ്പെട്ട് അഭിഷേകാണ് കാര്യങ്ങള്‍ കൈകാര്യം ചെയ്യുന്നതെന്നും റിപ്പോര്‍ട്ടുകളുണ്ട്. എന്നാല്‍, തൃണമൂല്‍ കോണ്‍ഗ്രസിന്റെയോ പാര്‍ട്ടിയുടെ ഒരു നേതാവിന്റെയോ നവമാദ്ധ്യമ അക്കൗണ്ടുകള്‍ തങ്ങള്‍ കൈകാര്യം ചെയ്യുന്നില്ലെന്ന് ഐപാക് ട്വീറ്റ് ചെയ്തു. പ്രതിപക്ഷം പുകമറ സൃഷ്ടിക്കുകയാണെന്നും മമതയും അഭിഷേകും തമ്മില്‍ ഒരു പ്രശ്നവുമില്ലെന്നും തൃണമൂല്‍ കോണ്‍ഗ്രസും ഐപാകും പറയുന്നു.
No comments