കുമാരസ്വാമി വീണപ്പോള് പണി കിട്ടിയത് യെദൂരപ്പയ്ക്ക്. 75 പിന്നിട്ട യെദൂരപ്പയെ മാറ്റി നിര്ത്തണമെന്ന് ആവശ്യം. ജഗദീഷ് ഷെട്ടാറും സദാനന്ദ ഗൗഡയും രംഗത്ത്. മുഖ്യമന്ത്രിക്കൊപ്പം സത്യപ്രതിജ്ഞ ചെയ്യിക്കണമെന്ന 15 എംഎല്എമാരുടെ സമ്മര്ദ്ദം വേറെയും. എതിര്ത്ത് ബിജെപി എംഎല്എമാരും. കുമാരസ്വാമിയെ കെണിയില് വീഴ്ത്തിയ യെദൂരപ്പ പെട്ടിരിക്കുന്നത് ഊരാക്കുടുക്കില്
ഇതിനിടെ പാര്ട്ടി നയപ്രകാരം 75 തികഞ്ഞ നേതാക്കള് ഭരണ നേതൃത്വത്തില് നിന്ന് ഒഴിഞ്ഞു നില്ക്കണമെന്ന ന്യായം ഉയര്ത്തി യെദൂരപ്പയ്ക്ക് പകരം തങ്ങളെ മുഖ്യമന്ത്രിയാക്കണമെന്ന ആവശ്യവുമായി മുന് മുഖ്യമന്ത്രിമാരായ ജഗദീഷ് ഷെട്ടാര്, കേന്ദ്രമന്ത്രി സദാനന്ദ ഗൗഡ എന്നിവര് രംഗത്തെത്തി.
ഇതില് അഴിമതി രഹിത പ്രതിശ്ചായയുള്ള ജഗദീഷ് ഷെട്ടാറിനേ മുഖ്യമന്ത്രിയാക്കാനാണ് കേന്ദ്ര നേതൃത്വത്തിന് താല്പര്യം.
ഇതിനിടെ സര്ക്കാര് രൂപീകരണം എളുപ്പത്തിലാകണമെങ്കില് വിമതരെ അയോഗ്യരാക്കുക തന്നെയാണ് ഉചിതമെന്ന മനോഭാവമാണ് ബി ജെ പി നേതൃത്വത്തിനുമെന്ന റിപ്പോര്ട്ടും പുറത്തുവരുന്നുണ്ട്.
ഈ സാഹചര്യത്തില് വിമതര് അയോഗ്യരാക്കപ്പെട്ടാല് ബി ജെ പിയ്ക്ക് തലവേദന ഒഴിയും. സമാധാനപരമായി സ്വന്തം എം എല് എമാരെ വച്ച് സര്ക്കാര് രൂപീകരിക്കുകയും ചെയ്യാം.
ഇതിനിടെയാണ് 76 കാരനായ യെദൂരപ്പയ്ക്കെതിരെയുള്ള സംസ്ഥാന നേതാക്കളുടെ പടയൊരുക്കം. ബി ജെ പിയുടെ എക്കാലത്തെയും മുതിര്ന്ന നേതാവായിരുന്ന എല് കെ അദ്വാനിക്കും യശ്വന്ത് സിന്ഹയ്ക്കും പ്രായപരിധിയുടെ പേരില് നിഷേധിക്കപ്പെട്ട ഭരണപദവികള് യെദൂരപ്പയ്ക്ക് മാത്രമായി അനുവദിക്കുന്നത് തെറ്റായ കീഴ്വഴക്കവും തെറ്റായ സന്ദേശവും സൃഷ്ടിക്കുമെന്ന വിമര്ശനം ഉയര്ന്നുകഴിഞ്ഞു.
എന്നാല് യെദൂരപ്പയെ പിണക്കിയാല് അതും സര്ക്കാരിന് തിരിച്ചടിയാകുമോയെന്ന ഭയം കേന്ദ്ര നേതൃത്വത്തിനുമുണ്ട്. പിളര്പ്പിലേക്ക് പോലും അത് കാരണമായേക്കാം. എന്തായാലും ഇപ്പോള് കുമാരസ്വാമിയുടെ തലവേദന ഒഴിഞ്ഞു. പകരം ബി ജെ പി നേതാക്കള്ക്കും യെദൂരപ്പയ്ക്കും ഉറക്കവും നഷ്ടമായി.
No comments