മോദി അനുകൂല പ്രസ്താവനയില്‍ കോണ്‍ഗ്രസ് നേതാവ് ശശി തരൂരിനെതിരേ കെ. മുരളീധരന്‍ എംപി രംഗത്ത്.
കോണ്‍ഗ്രസിന്‍റെ ചെലവില്‍ ആരും മോദിയെ സ്തുതിക്കേണ്ടെന്നും ഇത്തരക്കാര്‍ക്കു കോണ്‍ഗ്രസില്‍ സ്ഥാനമില്ലെന്നും മുരളീധരന്‍ പറഞ്ഞു.
മോദി സ്തുതിക്കാര്‍ക്കു വേണമെങ്കില്‍ ബിജെപിയിലേക്കു പോകാമെന്നും അദ്ദേഹം തുറന്നടിച്ചു.
മോദിയെ എപ്പോഴും കുറ്റം പറയുന്നതു നല്ലതല്ലെന്നും നല്ലതു ചെയ്താല്‍ അംഗീകരിക്കണം എന്നുമായിരുന്നു തരൂരിന്‍റെ പരാമര്‍ശം.
മോദി അനുകൂല പരാമര്‍ശവുമായി മുതിര്‍ന്ന കോണ്‍ഗ്രസ് നേതാവ് ജയറാം രമേശാണ് ആദ്യം രംഗത്തെത്തിയത്.
മോദി അത്ര മോശക്കാരനല്ലെന്നും മോദിയെ എപ്പോഴും കുറ്റം പറയുന്നതു കോണ്‍ഗ്രസിന് ഗുണം ചെയ്യില്ലെന്നായിരുന്നു രമേശിന്‍റെ പ്രസ്താവന.
ഇതിനു പിന്നാലെ മുതിര്‍ന്ന നേതാക്കളായ അഭിഷേക് മനു സിംഗ്വിയും ശശി തരൂരും ഇതേ നിലപാട് ആവര്‍ത്തിച്ചു.
ഞായറാഴ്ച തരൂരിന്‍റെ പരാമര്‍ശങ്ങള്‍ക്കെതിരേ പ്രതിപക്ഷ നേതാവ് രമേശ് ചെന്നിത്തല രംഗത്തെത്തി.
ആരു പറഞ്ഞാലും മോദിയുടെ ദുഷ്ചെയ്തികള്‍ മറച്ചുവയ്ക്കാനാകില്ലെന്നും ആയിരം തെറ്റുകള്‍ ചെയ്തിട്ട് ഒരു ശരി ചെയ്തുവെന്നു പറഞ്ഞു മോദിയെ ഉയര്‍ത്തിപ്പിടിക്കേണ്ട ആവശ്യമില്ലെന്നും ചെന്നിത്തല പറഞ്ഞു.
No comments