വട്ടിയൂര്‍ക്കാവിലും മറ്റും കരയോഗങ്ങള്‍ വിളിച്ചു കൂട്ടുന്നു, തിരഞ്ഞെടുപ്പില്‍ 'ബ്രഹ്മാസ്‌ത്രം' തന്നെ പ്രയോഗിക്കാനൊരുങ്ങി എന്‍.എസ്.എസ്

സംസ്ഥാനത്തെ അഞ്ച് നിയമസഭാ സീറ്റുകളില്‍ ഉപതിരഞ്ഞെടുപ്പിനുള്ള പരസ്യപ്രചരണത്തിന് ഇനി അഞ്ച് ദിവസം ശേഷിക്കെ,അവസാന ലാപ്പില്‍ കളം നിറയ്ക്കുന്നത് ശബരിമലയെ ചൊല്ലിയുള്ള വാദപ്രതിവാദങ്ങള്‍. അതിനിടെ, ശബരിമല യുവതീപ്രവേശനവിധിക്കെതിരായ പുന:പരിശോധനാ ഹര്‍ജികളില്‍ സുപ്രീംകോടതിയുടെ അന്തിമതീര്‍പ്പ് എപ്പോള്‍ വേണമെങ്കിലുമെത്താമെന്ന സൂചനയും ശക്തമാണ്. ചീഫ് ജസ്റ്റിസ് രഞ്ജന്‍ ഗോഗോയ് അടുത്ത മാസം വിരമിക്കുന്ന സാഹചര്യത്തിലാണിത്. യുവതീപ്രവേശനം വിലക്കി 1955ലും 56ലുമിറക്കിയ വിജ്ഞാപനങ്ങളുടെ പകര്‍പ്പ് സുപ്രീംകോടതി കഴിഞ്ഞ ദിവസം ചോദിച്ചു വാങ്ങിയതായും റിപ്പോര്‍ട്ടുകളുണ്ട്.

ശബരിമല വിഷയമെടുത്തിട്ട് ഇടതുമുന്നണിക്കും ബി.ജെ.പിക്കുമെതിരെ യു.ഡി.എഫ് ആക്രമണം കനപ്പിക്കുന്നു.