ഇന്ത്യയ്ക്ക് റഷ്യയുമായുള്ളത് തങ്ങളുടേത് പോലുള്ള ബന്ധമല്ല.. പക്ഷേ സാരമില്ല..; യുക്രെയിന്‍ വിഷയത്തില്‍ പ്രതികരിച്ച്‌ അമേരിക്ക..
ഇന്ത്യയ്ക്ക് റഷ്യയുമായുള്ള ബന്ധം തങ്ങളുടേതില്‍ നിന്ന് വ്യത്യസ്തമാണെന്ന് അമേരിക്കന്‍ വക്താവ് .റഷ്യ യുക്രെയിനില്‍ അധിനിവേശം ശക്തമാക്കിയതിന് പിന്നാലെ ക്രമസമാധാനം നിലനിര്‍ത്തുന്നതിനായി മോസ്കോയുമായി സ്വാധീനമുള്ള എല്ലാ രാജ്യങ്ങളും ശ്രമിക്കണമെന്ന് ബൈഡന്‍ ഭരണകൂടം ആവശ്യപ്പെട്ടിരുന്നു.
ഇതിന് പിന്നാലെയാണ് ഇന്ത്യയുടെ നിലപാട് സംബന്ധിച്ചുള്ള അമേരിക്കയുടെ പ്രതികരണം.
ചരിത്രപരമായി ഇന്ത്യയ്ക്ക് റഷ്യയുമായി അടുത്ത ബന്ധമുണ്ട്. ദക്ഷിണ ഏഷ്യന്‍ രാജ്യങ്ങള്‍ക്ക് ആയുധങ്ങള്‍ വിതരണം ചെയ്യുന്നതില്‍ പ്രധാനിയാണ് റഷ്യയുടെ തലസ്ഥാനമായ മോസ്കോ. ഞങ്ങള്‍ ഇന്ത്യയുമായി സുപ്രധാന താത്പര്യങ്ങളും മൂല്യങ്ങളും പങ്കിടുന്നു. എന്നാല്‍ റഷ്യയുമായി ഇന്ത്യയ്ക്ക് വ്യത്യസ്തമായ ബന്ധമാണുള്ളതെന്നും എന്നാലത് പൂര്‍ണമായും ശരിയാണെന്നും അമേരിക്കന്‍ വക്താവ് നെഡ് പ്രൈസ് മാദ്ധ്യമപ്രവര്‍ത്തകരോട് പറഞ്ഞു.
കഴിഞ്ഞ ദിവസം തങ്ങള്‍ ഇന്തോ പസഫിക്കില്‍ ക്വാഡ് യോഗത്തില്‍ ആയിരുന്നപ്പോള്‍ ഇന്ത്യയുടെ വിദേശകാര്യ മന്ത്രി ജയ്‌ശങ്കര്‍ ഓസ്ട്രേലിയയിലായിരുന്നു. ക്രമസമാധാനം നിലനിറുത്തുന്നതിനായി റഷ്യയുമായുള്ള സ്വാധീനം വേണ്ടവിധം എല്ലാരാജ്യങ്ങളും ഉപയോഗിക്കുന്നതു സംബന്ധിച്ച്‌ മെല്‍ബണിലായിരുന്ന വിദേശകാര്യ മന്ത്രിയുമായി ഉഭയകക്ഷി ചര്‍ച്ച നടത്തിയെന്നും നെഡ് പറഞ്ഞു. റഷ്യന്‍ ആക്രമണം സംബന്ധിച്ച്‌ പാകിസ്ഥാന്റെ നിലപാട് ആരാഞ്ഞതായും നെഡ് കൂട്ടിച്ചേര്‍ത്തു. ഇന്ത്യയ്ക്കും പാകിസ്ഥാനും അമേരിക്കയ്ക്കും റഷ്യയ്ക്കും ഒരുപോലെ പ്രയോജനം ചെയ്യുന്ന നിയമങ്ങളും മാനദണ്ഡങ്ങളുമാണ് ചര്‍ച്ചചെയ്തതെന്നും അമേരിക്കന്‍ വക്താവ് കൂട്ടിച്ചേര്‍ത്തു.
No comments